Македонката Илина Соколовска го освои второто место на републичкиот натпревар по ритмичка гимнастика кој се одржа во Гитерслог, Германија. Илина со семејството живее во Германија и настапува за германската лига. Германците го препознаа квалитетот на Илина и вложуваат во нејзиниот талент. Иако има само 12 години, поради големиот талент таа се натпреварува со повозрасната, професионална група на јуниори. Минатиот месец на првиот натпревар таа освои златото, а на последниот натпревар беше втора и освои сребро.
„Беше фантастична, имаше настап со три елементи, со јаже, чунови и тркало. Илина имаше многу добар настап, но првото место ѝ избега за нецел поен. Победничката има 15 години и настапува во истиот клуб со Илина“, напишаа медиумите во Германија за Илина.
Илина, која е еден од најголемите таленти по ритмичка гимнастика во Германија досега има освојувано многу златни пехари. Во нејзината категорија беше прогласувана и за најдобра во Германија, а лани на првиот интернационален натпревар во Украина го освои првото место и беше прогласена за принцеза.
