Денеска во Скопје на 76-годишна возраст почина филмскиот режисер Кирил Ценевски. Со неговиот прв филм „Црно семе“ Ценевски има освоено бројни награди на фестивалите во Југославија, а беше и прв македонски игран филм кој учествувал и бил наградуван на меѓународни филмски фестивали.
Роден е во Крива Паланка, студирал на Архитектонско-градежниот факултет во Скопје. Првпат на игран филм професионално е ангажиран како асистент на режисерот Љубиша Георгиевски во филмот Цената на градот (1970). Во 1971 година Ценевски го режира филмот „Црно семе“.
Ценевски е добитник на наградата „Златен објектив“ за 2013 година, која Кинотеката на Македонија ја доделува за исклучителен придонес во македонската кинематографија. Истата година беше првиот добитник и на наградата „Големата ѕвезда на македонскиот филм“, награда што ја воспостави Друштвото на филмските работници и ја доделува на Интернационалниот фестивал на филмската камера „Браќа Манаки“ во Битола.
Пред три месеци Кинотеката на Македонија го промовираше ДВД изданието со дигитално реставрираните играни филмови на Кирил Ценевски.
