Сузана Турунџиева и Атиџе Муратова го промовираа прв албум „Пола мене-пола тебе“, онаа позната реченица на Атиџе пчеларката од селото Бекирлија, за чија приказна преку документарецот „Медена земја“ дозна целиот свет.
Албумот има осум песни, на македонски и турски јазик, а го промовираа Скопје и двете пријателки кои се и автори на повеќето песни. Песните се снимани во студиото на Роберто Поп-Димитров „Кентаур“, кој е исто така дел од авторите.
Првата песна „Иста судбина“, во придружба на „Ми каса бенд“, ја испеаја со многу моции, оти какошто велат, судбината ги спои овие две жени, а и во песните познатата пејачка и водителка Сузана Турунџиева вели дека има чувство како цел живот да ја познава Атиџе.
Благодарение на хуманоста на многу пријатели на Турунџиева, Атиџе и нејзиниот брат Феим сега се преселени во новата куќа во селото Дорфулија.
„Малку поплакав кога се селев од Бекирлија, седев на скалите на старата куќа и плачев. Ми падна жал за моето село, таму сум го поминала целиот живот. Од петокот сум преселена во новата куќа. Многу ни е убава куќата“, рече Атиџе по промоцијата.
Се промовираа и два нови спота, за една турска народна песна и за песната која Турунџиева ја напиша, а се вика едноставно, „За Атиџе“. И двата спота се снимани во Истанбул, од каде што двете дами неодамна се вратија .
„Оваа песна е моја ода на благодарност кон Атиџе. Таа ме научи да го сакам живитот и кога е суров. И кога врне дожд, таа се радува и вели бериќет. Со женските здруженија со кои бевме во Турција се трудиме да ѝ обезбедиме примања за пристоен живот. Годинава има слабо мед, едвај 50 тегли се извадија. Затоа, сите оние кои сакаат да ѝ помогнат на Атиџе, и ќе го купат албумот по цена од 500 денари, парите одат за неа“, рече Сузана.