Поп-пејачот Влатко Лозаноски денеска го промовира новиот спот за баладата „Надеж“. Тој првпат сними видео во кој е во малку послободно издание, па ги изненади своите обожаватели. Лозано во спотот ја гушка, бакнува и соблекува манекенката Билјана Шкортова, која ја има главната женска улога во видеото. Тој доби пофалби за песната, но и комплименти за видеото.
„Конечно, време беше да се опуштиш“, „Сите песни годинава ти се преубави, која од која“, „Лозано – синоним за добра македонска музика“ се дел од коментарите на социјалните мрежи.
„’Надеж’ е песна во која многу верувам и знам дека ќе ѝ се допадне на публиката. Песната и спотот се снимени уште на почетокот на годината, го имам истиот имиџ како и на ‘Километри”. Со мојот тим решивме дека сега е одлично време да ги почестиме љубителите на македонска музика со оваа балада“, вели Лозано.
Баладата „Надеж“ ја напишаа Лазар и Магдалена Цветкоски, а спотот го изработи „Веста продукција“. Новата песна е дел од третиот албум на Лозано „Десет“, на кој ќе се најдат и „Километри“, „Јако, Јако“, „Камо тебе да те имам“, „Мандарина“, „Жена како ти“, „Како тебе нема друга“, „Пред да се раздени“ и „Бонбона“.
