Музиката на Кирил Џајковски е дел од нивиот проект „Пуста земја“ на музичко балетскиот перформанс Амстердам Синфониета.
Балетски перформанс е инспириран од една од најпознатите поетски творби на 20 -тиот век „Пуста земја“ од Т.С. Елиот. Освен од Кирил Џајковски во овој проект се користеше музика и од Stravinsky, Layegh, Berg, Nyman.
Проектот кој во холандските медиуми беше опишан како прекрасна фузија од музика, поезија и танц беше одлично примен и посетен од холандската публика во Амстердам, Ротердам, Утрехт, Тилбург и останатите градови во кои се реализираше оваа турнеја.
„По неверојатната турнеја, може да ги погледнете еден од највпечатливите моменти на овој перформанс, изведбата на Brothel Tango од Кирил Џајковски“, изјавија од Амстердам Синфониета.
Овој проект е уште едно продолжување на активностите на Џајковски поврзани со театарска и филмска музика. Пред неколку месеци работеше на музиката за последниот проект на Александар Поповски „Хероини“ кој беше поставен во Љубљанскиот градски театар, а во текот на идниот месец своја фестивалска премиера ќе има и словачкиот филм „Piargy” кој го режираше Иво Трајков, а за кој музиката ја напиша Џајковски. Во ноември и музиката од филмот „Прашина“ на Милчо Манчевски за првпат ќе има официјално дигитално издание на сите светски дигитални музички сервиси.
