Бендот „Џипси Балкан“, од Барселона, кој го сочинуваат музичари од целиот свет, на 11 декември ќе одржи концерт пред македонската публика во Филхармонија. Концертот е закажан во 20 часот, а ќе биде во рамки на концертната турнеја по повод јубилејната 10. година од основањето на бендот.
Билетите се пуштени во продажба преку продажната мрежа на МКтикетс , и тоа во три категории и по цена од 1000 и 1200 денари, како и 1500 денари за ВИП влезниците.
Меѓу нивните последни интерпретации на традиционални песни од сите краишта на светот е како што велат самите, безвременскиот класик, „Море сокол пие“, а на концертот во Скопје публиката ќе може да ужива уште и во изведбите на „Македонско девојче“ и веселата и ритмична румба на кралицата на ромската песна Есма Реџепова – Теодосиевска „Калеја Јаца“.
Екипата составена од Италијанката Маргерита Абита (вокал), Иван Ковачевиќ (контрабас, Србија), Стелиос Тогиас (перкусии, Грција), Жулиен Шанал (гитара, Франција), Чави Пендон, (кларинет, Шпанија), Пере Ноласк Туру (виолина, Шпанија) и Фернандо Салинас (хармоника, Шпанија) досега има 6 издадени албуми, свирено на концерти во повеќе од 40 земји, повеќе од 160 000 следбеници и 90М прегледи.
Од оваа меѓународна формација произлегуваат најдобрите аранжмани, каде што секој инструмент има свое место и простор. Текстурите и тембрите се фино измешани во служба на секоја песна, од евоцирање емоции до френетичен транс ритам.
За потсетување, бендот неодамна беше во шоуто на Зоран Кесиќ, каде исто така ја испејаа „Море сокол пие“.
