Новата биографија за легендарниот рок-бенд The Rolling Stones открива шокантни детали од животот на фронтменот Мик Џегер, вклучувајќи два драматични моменти кога за малку ја избегнал смртта.
Според извадоците што деновиве се објавуваат во светските медиуми, првиот инцидент се случил во 1976 година во Њујорк. Џегер наводно се предозирал со хероин во станот на музичкиот продуцент Маршал Чес, по ноќ исполнета со забави и дрога.
Чес сведочи дека пејачот дошол доцна навечер барајќи дрога, по што заедно отишле кај дилер и земале мала количина хероин. Само неколку минути подоцна, Џегер се срушил на подот во бесознание.
„Беше целосно неподвижен, усните почнаа да му посинуваат. Помислив дека ќе умре во мојот стан“, раскажува Чес во книгата.
Во паника, тој повикал итна помош, а во меѓувреме се обидувал да го одржи во живот со реанимација. На помош пристигнале и влијателни личности од музичката индустрија, а Џегер бил тајно пренесен во болница за да се избегне медиумски скандал. Само по интервенција со кислород, пејачот повторно почнал да дише.
Вториот драматичен момент, опишан во книгата, се случил во 1984 година во Амстердам и, иако започнал како банална расправија, можел да заврши трагично.
По ноќно излегување, Џегер наводно го испровоцирал тапанарот Чарли Вотс, повикувајќи го со зборовите „мојот тапанар“. Вотс, видно навреден, се појавил во елегантен костум, го зграпчил Џегер и му удрил силен удар во вилицата.
Во метежот, Џегер почнал да паѓа наназад кон отворен прозорец над канал, но во последен момент бил спасен од Кит Ричардс, кој го фатил за ногата и спречил пад што можел да има фатални последици.
Овие приказни фрлаат ново светло врз бурниот живот на рок-иконите и потсетуваат дека зад славата и успехот често се кријат моменти на вистинска опасност и драматични пресврти.
