Холивудската актерка Глен Клоуз, која осумпати беше номинирана за Оскар, но досега не освои натпреварувачка награда, ќе добие почесна статуетка за придонесот во филмската уметност. Признанието треба да ѝ биде врачено на церемонијата „Гувернерс авардс“ во Лос Анџелес, закажана за вечерта на 15 ноември.
Филмската академија соопшти дека со почесен Оскар ќе биде награден и режисерот Ридли Скот, авторот на „Гладијатор“, „Осмиот патник“ и „Истребувач“. Меѓу годинашните добитници е и аниматорот Флојд Норман, додека продуцентките Кристин Вашон и Памела Кофлер ќе добијат признание за својата работа во независниот филм.
За Глен Клоуз, наградата доаѓа по повеќе од пет децении актерска кариера и над сто филмски улоги. Таа со години важи за една од најпочитуваните актерки во Холивуд што не освоиле Оскар во натпреварувачките категории.
Нејзината прва номинација пристигна за филмот „Светот според Гарп“. Потоа следуваа номинации и за „Големото заладување“, „Природен талент“, „Фатална привлечност“, „Опасни врски“, „Алберт Нобс“, „Сопругата“ и „Хилбили елегија“.
Според Асошиејтед прес, Клоуз и актерот Питер О’Тул го делат рекордот од по осум актерски номинации без натпреварувачка победа. Актерката, сепак, во кариерата има освоено други значајни признанија, меѓу кои награди „Еми“, „Тони“ и „Златен глобус“.
Признание и за Ридли Скот
Почесен Оскар е најавен и за британскиот режисер Ридли Скот, чија кариера опфаќа филмови од научна фантастика и историски спектакли до драми и трилери.
Тој бил номиниран за режија за „Телма и Луиз“, „Гладијатор“ и „Падот на црниот јастреб“, како и за најдобар филм како продуцент на „Марсовец“. И покрај номинациите, досега нема освоено натпреварувачки Оскар.
Според Асошиејтед прес, Скот нема лично да присуствува на церемонијата, туку се очекува да се обрати преку претходно снимена видеопорака.
Академијата ќе му оддаде признание и на Флојд Норман, кој работел на анимирани филмови како „Книгата за џунглата“, „Приказна за играчките 2“ и „Чудовишта, АД“.
Продуцентките Кристин Вашон и Памела Кофлер, основачки на компанијата „Килер филмс“, ќе ја добијат наградата „Ирвинг Г. Талберг“. Меѓу филмовите поврзани со нивната продукциска куќа се „Керол“, „Момчињата не плачат“ и „Минати животи“.
„Гувернерс авардс“ е посебна церемонија на Филмската академија, одвоена од главното доделување на Оскарите. Годинешните признанија се наменети за уметници и продуценти чија работа оставила трага во филмската индустрија.
Извори: Филмска академија и Асошиејтед прес преку ABC News.
