Само неколку дена пред стартот на Евровизија 2026, организаторите воведоа нови строги безбедносни правила кои веќе предизвикуваат реакции кај фановите и медиумите. Според најновото соопштение, оваа година во арената и во сите официјални простории на настанот ќе бидат дозволени исклучиво знамиња што ги исполнуваат австриските безбедносни стандарди.
Евровизија 2026 ќе се одржи на 12, 14 и 16 мај во Виена, а локалните власти наложиле сите знамиња што ќе се внесуваат во просторот на настанот – вклучувајќи ја главната арена, фан-зоните и медиумскиот центар – да бидат изработени од незапаливи, односно огноотпорни материјали.
Тоа значи дека посетителите, делегациите и новинарите ќе мора да приложат и соодветен сертификат кој потврдува дека знамето е произведено според пропишаните стандарди за заштита од пожар.
Организаторите посочуваат дека мерката е донесена по препорака на безбедносните служби и противпожарните инспекции во Австрија, со цел да се намалат ризиците во затворени простори каде ќе има десетици илјади посетители.
Според правилата, секое знаме што нема валиден сертификат или не ги исполнува критериумите ќе биде одземено уште на влезот и нема да може да се внесе во арената.
Контролите ќе бидат засилени на сите безбедносни пунктови, а организаторите предупредуваат дека нема да има исклучоци, без разлика дали станува збор за национални знамиња, навивачки транспаренти или симболи на учесниците.
Новата мерка веќе предизвикува поделени реакции на социјалните мрежи. Дел од фановите сметаат дека правилото е неопходно поради безбедноста, додека други оценуваат дека процедурите се премногу строги и ќе создадат дополнителни проблеми за посетителите кои традиционално носат голем број знамиња и реквизити.
И покрај тоа, организаторите нагласуваат дека безбедноста оваа година е апсолутен приоритет и дека сите посетители однапред ќе бидат информирани за точните технички услови што мора да ги исполнуваат знамињата пред влез во арената.
