Фудбалската ѕвезда Лионел Меси си заминува од Барселона. Ова вчера го потврдија и официјално од каталонскиот клуб. Барселона нема да потпише нов договор со Аргентинецот откако преговорите меѓу двете страни наидоа на проблеми, без можност за решение.
Откако шпанските медиуми објавија за овој распад, Барселона и формално потврди дека нема да потпише нов договор со Аргентинецот.
Меси и така беше без договор по истекот на претходниот на 30 јуни, но досега вестите од Каталонија велеа дека се согласил на договор со 50 отсто помала плата и дека се чека Барса да ги среди финансиите за тој да биде официјализиран. Но, Барселона вели дека тоа е невозможно.
„Поради регулативите на шпанската Ла Лига, не може да се формализира договорот, што значи дека Лионел Меси нема да продолжи со Барселона. Двете страни изразуваат длабоко жалење дека не може да се исполнат желбите на клубот и фудбалерот“, се вели во објавата на Барселона.
Сега, неизбежно Манчестер сити и Пари Сен-Жермен, како два финансиски најсилни клуба во Европа, повторно влегуваат во игра за потписот на Меси.
Ова е крај на историско партнерство помеѓу 34-годишниот Меси и Барселона откако тој се пресели во Шпанија да влезе во нивната академија на 13 години во 2000. Тој си заминува од Барселона со 778 меча во сите натпреварувања, 672 постигнати гола и 305 асистенции.
