Еден од најдобрите фудбалери во историјата на Македонија, Дарко Панчев, проговори за испаѓањето на најтрофејниот македонски клуб Вардар, во втората лига.
Панчев кој стана европскиот и светски првак со Црвена звезда, вели дека клуб со традиција каков што е Вардар мора да ја има поддршката и од државата.
„Друга песна ќе се пееше да имавме овде претседател каков што е Александар Вучиќ во Србија. Претседателот на Србија го сака спортот, но, уште поважно е дека тој знае дека спортските успеси се најевтин и најдобар вид на промоција на една држава“, вели Панчев.
Во интервју за „Моцарт спорт“, Панчев откри што се случувало во клубот додека тој таму работел како спортски директор.
„Кога се пласиравме во Лига Европа им кажав на луѓето во клубот дека немаме тим кој може да биде конкурентен. Добивме пет милиони евра од УЕФА, со тие пари можевме да го проектираме буџетот за наредните три сезони. За условите во македонскиот фудбал тоа се големи пари. Јас не ја препознав желбата кај нив дека сакаат да работат на засилување на тимот. И бев во право. Реал Сосиедад ни даде шест, Зенит пет гола. Само со Розенборг одигравме нерешено на домашен терен“, изјавил Панчев.
„Сега кога сѐ помина, ќе ви откријам дека имав договорен напаѓач од втората турска лига. Навистина сакав да направам сериозен тим. Во тој момент тој беше најдобриот стрелец во таа лига. Јас знам да препознам квалитетен напаѓач. Сакаше да дојде и да игра за нешто малку повеќе од 200.000 евра. Блиску беше и еден Израелец. меѓутоа челниците сето тоа го одбија. Тие само го искористија моето име. Моето и името на Илија Најдоски. Немаа желба да направат добар тим. После на навивачите им ја сервираа приказната дека јас сум виновен, дека треба да си заминам. Кога го видов тоа, веднаш си поднесов оставка“, изјавил Панчев.
