Поранешниот претседател на Барселона, Џосеп Марија Бартомеу и неговиот некогашен советник, Хауме Масферер, со кауција се пуштени на слобода. Бартомеу, Масферер и уште неколку луѓе од поранешното раководство на каталонскиот клуб, беа уапсени и една вечер минаа во притвор.
„Истражниот суд во Барселона, по повод случајот кој е покренат во мај 2020 година, поради нелојалната администрација и корупција во работењето, ги сослуша поранешните челници на Барслона. Двајцата, во вторникот, беа изведени пред истражниот судија. Тие се повикаа на своето право да не сведочат. Судијата се согласил да бидат пуштени со кауција“, се наведува во соопштението.
Истрагата против Бартомеу и неговите најблиски соработници е покрената под сомнение дека плаќал „ботови“, кои на социјалните мрежи ја уништувале репутацијата на одредени сегашни и поранешни фудбалери на Барселона.
