Швајцарското обвинителство поднесе обвинение против поранешниот претседател на ФИФА, Сеп Блатер, и поранешниот шеф на УЕФА, Мишел Платини, поради измама и други кривични дела. Обвинителството истрагата ја водело последните шест години, а се работи за исплата на 2 милиони долари што Блатер му ги дал на Платини за консултантски услуги во периодот од 1998 до 2002 година.
„Оваа уплата ја оштети ФИФА и доведе до незаконско богатење на Платини“, се наведува во соопштението од Обвинителството.
Истрагата е покрената во септември 2015 година и таа предизвика предвремено заминување на Сеп Блатер (85) од местото прв човек на светскиот фудбал, додека Платини (66), тогаш прв човек на европскиот фудбал, мораше да се повлече од кампањата за претседател на ФИФА.
И двајцата негираа дека направиле нешто противзаконско.
На поранешните први луѓе на светскиот и европскиот фудбалски сојуз ќе им се суди во судот во Белинцона.
