Синоќа, Советот на Општина Аеродром донесе одлука за преименување на спортскиот центар „Ново Лисиче“ во СЦ „Марко Божиновски“ во чест на македонскиот ракометен репрезентативец, кој ненадејно и прерано почина пред шест месеци на 20-годишна возраст. Во објектот, познат и како „Дупка“, многу од сегашните и идни кошаркари и ракометари ги имаат направено токму тука своите први чекори.
Божиновски, кој играше за прволигашот Бутел, израсна во Аеродром и беше огромен навивач на МЗТ Скопје поради што членовите на општинскиот Совет одлучија да направат нешто со што тој никогаш нема да биде заборавен.
На почетокот на јуни тој почина во сон, само два дена по последниот одигран натпревар во дресот на Бутел. Во својата кариера беше дел од кадетската репрезентација на Македонија, која настапи на СП 2019, а играше и за младинскиот национален тим.
