Пред 40 години беше симбол на рок ѕвездите и фудбалерите. На модните писти и Холивуд се враќа поделената фризура која ги руши родовите норми. „Фудбалерка“, кратка напред, долга назад, фризура која ја носеа легендарните поп-ѕвезди како Принц и Боун кон крајот на 80-тите и раните 90-ти, повторно е во мода. Но, не треба да очекувате дека сите ќе брзаат на фризер.
Таа сè уште е една од најконтроверзните фризури и многу луѓе сè уште ја гледаат со презир. Освен тоа, нејзиното име точно не зрачи со гламур. На англиски се нарекува „mullet“, што доаѓа од зборот „mullethead“, кој се користел за опишување на глупави луѓе во 19 век.
Во Европа, беше популарна меѓу фудбалерите. Во Данска сè уште се нарекува „bundesligahaar“ бидејќи се смета за карактеристика на фудбалерите на германската фудбалска лига. Фризурата беше популарна и во квир заедницата.
Таквата фризура беше икона и пред осумдесеттите. Дејвид Боуви, Род Стјуарт, Кит Ричардс и Пол Макартни ја носеа една деценија пред тоа.
„Њујорк тајмс“ објасни дека „фудбалерката“ како шлем бил вообичаен во античка Асирија, Египет и Грција. „Грчките текстови сугерираат дека стилот бил особено популарен меѓу воините; несомнено, подолгите „опашки“ им го одржувале вратот топол, додека шишките обезбедувале јасно да видат“, напиша NYT.
Неодамнешното оживување на фризурата првично беше само тренд на модните писти на брендови како Гучи и Оф-Вајт. Во последниве години стана хипстерски феномен и се почеста глетка. Оваа година, за прв пат, на мажите им беше дозволено да учествуваат во Next Topmodel на Хеиди Клум во Германија, а двајца од натпреварувачите имаа „фудбалерка“.
„Веќе неколку пати вклучивме варијанти на таа фризура во нашите трендовски колекции – и за мажи и за жени. Но, секогаш е потребно време пред модата навистина да „фати“, потребни се неколку години“, вели Антонио Вајничке, уметнички директор на фризерското Германското здружение.
Вајничке нагласува дека денешните „фудбалерки“ не личат на оние од осумдесетите. Машките кроеви се многу помеки и не се екстремно долги одзади, а се кратки и речиси избричени од страните. „Денес слоевите се порамномерни и целината се носи порамна и поширока“, рече тој.
