Истражувачите од јапонскиот град Аомори пробуваат да го решат проблемот со недостиг на електрична енергија, па затоа почнаа да ги проучуваат методите за производство на струја од снег.Аомори се наоѓа на 715 километри северно од Токио. Покрај боровите шуми, градот е познат како едно од местата со најмногу снег во земјата, во кој секоја година паѓаат меѓу 7,5 и 8 метри снег. Лани градските власти потрошија 46 милиони долари за расчистување на зградите и улиците. Јапонците се ослободуваат од снегот фрлајќи го во морето. Иако процесот изгледа едноставен, градот троши многу време, ресурси и пари.
Поради ова, тим истражувачи од компанијата „Форте“ и Универзитетот за електро-комуникации во Токио, предложија снегот да се користи за производство на чиста и прифатлива електрична енергија. Тестирањето на оваа идеја веќе започна во базенот на една напуштена училишна зграда, пишува „Јапонски тајмс“. Истражувачите веруваат дека нивниот пристап може да им помогне на голем број европски земји кои моментално се соочуваат со енергетска криза поради војната во Украина. Повеќето од овие земји немаат проблем со недостаток на снег, па би можеле да го искористат за производство на чиста енергија.
За време на истражувањето, јапонските научници ќе користат големо количество снег и надворешен воздух за напојување на турбина која произведува електрична енергија. Надворешниот воздух има повисока температура од воздухот што го опкружува снегот бидејќи се загрева од сонцето.
Научниците ќе користат топлински цевки за да донесат ладен воздух (од снегот) и топол воздух (од отворено) до течноста за ладење во турбината. Разликата во температурата на ладниот и топлиот воздух ќе доведе до зголемување на струјата на конвекција во течноста за ладење на турбината, а оваа струја на крајот ќе предизвика турбината да се ротира и да генерира електрична енергија.
Тимот научници тврди дека нивниот метод за производство на електрична енергија базиран на снег може да ја постигне истата ефикасност како соларната централа, а можеби и на многу поисплатлив начин. Ефикасноста на овој систем зависи и од факторот на температурна разлика. Колку се поголеми температурните разлики, толку е поголема ефикасноста на производството на електрична енергија.
Ова не е прв пат научниците да се обидат да генерираат електрична енергија користејќи снег, бидејќи во 2019 година тим истражувачи во Калифорнија развија уред кој може да генерира електрична енергија од снег што паѓа. Сепак, овој метод може да напојува само мали уреди. Имаше и други слични студии, но ниту една од нив не нуди остварливо решение како она што го спроведоа јапонските научници.
Но, постојат и одредени предизвици. За да може процесот да биде скалабилен, потребни се големи капацитети за складирање. Покрај тоа, неопходно е да се обезбеди континуирано снабдување со топол воздух во снежните региони. Научниците ќе спроведат истражување во Аомори до март за да ја тестираат изводливоста на нивниот метод. Во меѓувреме, тие ќе бараат начини да го соберат топол воздух од топлите извори во обид да ги надминат ограничувањата.
Доколку јапонските научници бидат успешни, нивниот метод ќе стане нова револуција во обновливите извори на енергија и ќе биде особено важен за студените региони во светот.
