Мистериозна пештера убива сè што ќе ѝ се приближи

Пештера пронајдена во близина на антички храм во денешна Турција е наречена Портите на пеколот затоа што секое животно што се приближило до истата умрело од необјасниви причини.

Пештерата се наоѓа во рушевините на античкиот град Хиераполис, а во древните времиња се користела за принесување жртви на подземниот бог Плутон. Кога ќе приложеле бик или коза до таинствената пештера, тие умирале, но свештениците кои ги донеле преживувале. Луѓето кои премногу ќе ѝ се доближеле исто така умирале, пишува UNILAD.

„Пештерата е полна со магла, која е толку густа и таинствена што едвај се гледа тлото. Секое животно што ќе влезе во неа веднаш умира. Ако пуштиш внатре врапче, во истиот момент ќе падне мртво“, напиша старогрчкиот историчар Страбо. Во тоа време се верувало дека животните биле убиени од смртоносниот Плутонов здив.

Археолозите кои го истражувале Хиераполис и самите се убедени во неговите смртоносни својства бидејќи виделе птици кои умираат штом ќе влезат во пештерата.

Вулканологот Харти Пфанц од германскиот универзитет Дуисбург, Есен, оваа необична појава ја објаснил со испарувањето на поголема количина јаглерод диоксид, што е последица на сеизмичка активност во подземјето.

Мерењата покажале дека нивото на јаглерод диоксид е најголемо на висина од 40 сантиметри од тлото. Најголемата концентрација е измерена во зора кога, како што тврдат научниците, би можела да убие човек во рок од една минута.

„Свештениците во текот на жртвувањето на животните стоеле на голем камен и така изгледало дека имаат натприродни моќи. На таа висина би можеле да бидат 20 до 40 минути без опасност. Ако задржеле здивот извесно време, свештениците би можеле да влезат внатре до висина на половина“, објаснил професорот Пфанц.

 

 

Scroll to Top