Одржувањето здраво варење е многу важно за целокупното здравје, а еден од најдобрите начини да се промовира здраво варење е да се внесува доволно влакна. На пример, јаткастите плодови се храна богата со влакна која можеме да ја додадеме во нашата исхрана, а исто така се полни со протеини, здрави масти, витамини и минерали.
„Влакната помагаат во промовирање на редовно и здраво варење и ги хранат добрите бактерии во цревата“, вели диететичарката Јулија Зумпано за Парад. Таа наведува дека влакната исто така можат да помогнат во контролата на шеќерот во крвта и да го намалат холестеролот.
Друг важен аспект на влакната е тоа што може да го намалат ризикот од рак на дебелото црево бидејќи го одржуваат дигестивниот систем здрав, вели гастроентерологот д-р Пратима Диба.
Јаткастите плодови можат да бидат одличен извор на влакна, заедно со свежо овошје и зеленчук, цели зрна, грав и мешунки. Сепак, експертите особено истакнаа три типа на јаткасти плодови.
Кога јадете јаткасти плодови најдобра е разновидноста, истакнува Зумпано. Секој вид обезбедува уникатен сет на хранливи материи. Сепак, таа и д-р Диба препорачуваат особено три вида: бадеми, ореви и ф’стаци. „Тие имаат најмногу влакна и најмалку заситени масти“, објаснува Зумпано, истакнувајќи дека тие нудат и многу други здравствени придобивки.
Бадемите имаат помалку јаглехидрати и калории од другите видови јаткасти плодови. Околу 28 грама бадеми содржат 3,5 грама влакна, кои можат да го подобрат здравјето на цревата. Тие исто така содржат калциум, кој придонесува за здравјето на коските, како и витамин Е, кој помага да се намали воспалението во телото.
Од друга страна, оревите се сметаат за суперхрана. Тие содржат антиоксиданси и омега-3 масни киселини, еден од најздравите видови масти. Покрај тоа, тие помагаат во намалувањето на холестеролот, спречуваат срцеви заболувања и се борат со воспаленија кои често се поврзуваат со бројни хронични здравствени состојби, велат експертите.
Понатаму, приближно 28 грама ф’стаци содржат три грама влакна и 159 калории. Нивната висока содржина на влакна може да го подобри здравјето на цревата и да придонесе за здраво варење. Ф’стаците исто така содржат масти, здрави за срцето кои можат да го намалат холестеролот.
