Јачменот е цело зрно богато со влакна и хранливи материи кои можеби не ги вклучуваме често во исхраната, но во продолжение откријте зошто треба почесто да ја јадете оваа храна. Двата главни типа на јачмен се:
Целиот јачмен: Го задржува надворешниот слој од трици и содржи повеќе влакна од лупениот јачмен. Потребно е подолго време за готвење, па затоа е идеален за супи и чорби.
Излупен јачмен: триците се отстранети, што го скратува времето за готвење. Често се користи како состојка за мусли, супи и салати.
Излупениот јачмен почесто се јаде и се готви од 25 до 30 минути, додека на целиот јачмен може да му треба и до еден час готвење.
Многу луѓе не консумираат доволно влакна, а јачменот е многу богат со влакна и јаглехидрати. Чаша варен интегрален јачмен содржи 6 грама влакна, додека излупениот јачмен има 3 грама. Освен влакна, јачменот е извор на тиамин, манган, фосфор, селен и магнезиум, кои се важни за здравјето на коските, метаболизмот и имунитетот.
Иако има здравствени придобивки, некои луѓе не треба да го јадат. Јачменот содржи глутен и не е погоден за луѓе со целијачна болест или нетолеранција на глутен, а може да предизвика реакции кај оние со алергија на пченица, пишува „Yahoo Life“.
Здравствени придобивки од јачменот
Јачменот и интегралните житарки се поврзани со бројни здравствени придобивки.
Контрола на холестерол: Јачменот содржи бета-глукан, растворливи влакна кои помагаат да се намали холестеролот со врзување во цревата и со влијание врз микробиомот.
Регулирање на шеќерот во крвта: Конзумирањето цели зрна, како јачменот, може да го намали ризикот од дијабетес тип 2 и да го подобри нивото на шеќер во крвта на гладно.
Намалување на воспалението: Целите житарки, вклучително и јачменот, може да го намалат воспалението, кое е поврзано со срцеви заболувања, дебелина и рак.
Влијание врз респираторните проблеми: Истражувањата покажуваат дека 100 грама јачмен дневно може да ги ублажи симптомите како што се назална конгестија и кивање.
Управување со тежината: Истражувањата сугерираат дека конзумирањето на јачмен во вечерните часови го стимулира хормонот GLP-1, кој го намалува внесот на храна и чувството на глад следниот ден.
Го подобрува варењето: Јачменот помага да се задоволат дневните потреби за влакна, што го подобрува варењето, го намалува ризикот од рак на дебелото црево и го ублажува запекот.
