Оскаровецот Метју Меконахи во неделата на Инстаграм објави дека засега не сака да се кандидира за гувернер на Тексас. Претходно политичките амбиции на глумецот предизвикаа восхит во либералните кругови, особено меѓу луѓето од Тексас.
Тие беа згрозени од одлуките на актуелниот гувернер Грег Абот, кој, меѓу останатото, го потпиша рестриктивниот закон за забрана на абортус.
„Јас сум едноставен клинец од градчето Увалде во Тесас и никогаш не ми паднало на памет еден ден да станат политички лидер“, рече Метју.
Анкетите покажале дека тој би поминал подобро во однос на неговите потенцијални противкандидати Абот и Бето Орорк, поранешниот демократски претседателски кандидат, кој во ноември и официјално влезе во трката за гувернер.
Глумецот порача дека одлучил да се фокусира на служење на жителите на Тесас, но, на поинаков начин. Тој зборуваше за одговорноста и проблемите со кои се соочува локалната, но и државната политика. Рече дека размислувал за можноста да се кандидира, слушал и ја анализирал тексашката и американската политика, настојувајќи да утврди како е најдобро да им служи на жителите на Тексас.
Метју рече дека размислувал и за државната и националната политика и донел заклучок дека постојат проблеми кои мораат да се решат и дека на американската политика и треба нова цел, затоа што е многу поделена и треба да се излечи.
Тој вети дека ќе продолжи да ги поддржува компаниите и фондациите чии челни луѓе ги смета за успешни лидери кои на луѓето им овозможуваат да го остварат својот американски сон, успех и просперитет.
