Австралиската тенисерка, Ешли Барти, без загубен сет ја освои титулата на женскиот турнир на Австралија опен откако во финалето ја победи Американката Даниела Колинс со 6-3, 7-6. Со тоа Барти стана првата Австралијанка што го освоила Австралија опен по 44 години.
Ова е трета Гренд-слем титула за прворангираната светска тенисерка. Таа пред триумфот на Австралија опен, освои уште две Гренд-слем титули во кариерата, лани на Вимблдон во Лондон и во 2019 година на Ролан Гарос во Париз.
Утре во машкото финале на турнирот ќе играат Данил Медведев и Рафаел Надал, кој ќе се бори за неговата 21. Гренд слем титула во кариерата.
