Ракетата на НАСА која требаше да патува до Месечината доживеа уште едно опасно истекување денес, бидејќи тимот за лансирање почна да ја снабдува со гориво за планираниот пробен лет.
По втор пат оваа недела, тимот почна да полни речиси милион галони гориво во ракетата долга 98 метри, најмоќната ракета што НАСА некогаш ја изградила.
Обидот за лансирање во понеделникот наиде на проблеми со сензорот на моторот и истекување на гориво, поради што лансирањето беше прекинато и презакажано за денес.
Рано утринава се огласи аларм за прекумерен притисок и операцијата за полнење гориво беше накратко прекината, но немаше преоптоварување и полнењето гориво продолжи, соопшти Launch Control. Но, неколку минути подоцна водородното гориво почна да истекува од делот каде што моторот се наоѓа на дното на ракетата. НАСА ја прекина операцијата додека инженерите се обидуваа да ја затворат празнината.
Часовникот се уште одбројува до планираното лансирање попладнево по локално време. НАСА денеска има два часа кога се смета дека условите се поволни за лансирање. Лансирањето ќе биде првиот лет во програмата на НАСА за истражување на Месечината во 21 век, наречена Артемида по митолошката сестра близначка на Аполо.
Во капсулата Орион што треба да ја носи ракетата, сега нема астронаути, туку наместо нив се пробни кукли, опремени со сензори за мерење на вибрации, космичко зрачење и други услови. Под претпоставка дека пробниот лет со куклите оди добро, астронаутите треба да одат на втор лет околу Месечината во 2024 година. Во третата фаза е планирано слетување на Месечината и според сегашните проекции би требало да биде во 2025 година.
