„Би-би-си травел“, светски познатата интернет-страница за патување, направи репортажа за Вевчани. Во текстот објавен на нeјзиниот портал пишува дека селото е познато по карневалот што се одржува секој јануари, по вевчанските пасоши и по валутата што самите си ја издаваат, но и дека во последните 50 години барем трипати се обиделе да прогласат независност.
„И покрај тоа што има само 2.400 жители, Вевчани трипати се обиде да прогласи независност од две земји во последните пет децении. Во 1987 година првпат се закани со отцепување од Југославија. Потоа, во 1991 година, селото се прогласи за независна република, само 11 дена откако Македонија прогласи независност за време на распадот на Југославија. Се пиеше ракија, се точеше пиво. И во 2002 година слободарскиот дух на т.н. република Вевчани беше оживеан од локалното население како микронација, со необичен обид да привлече туристи и да се потсмева на политиката на земјата, со веење национално знаме, издавање пасоши и печатење валута. Фасцинантно село на планината Јабланица, што мора да го видите“, пишува Би-би-си во најновата репортажа за една од најмалите општини во земјата.
„Направивме локални пасоши и печатевме валута за да го рекламираме Вевчани. Самостојната серија на Вевчани датира со векови. Иако се наоѓа на само 20 минути возење од Струга, најголемиот град на северниот брег на Охридското Езеро, изолираниот и непробоен терен на планината Јабланица гарантира дека вевчанци одамна може да ја потврдат својата автономија. Луѓето на Балканот сакаа да дознаат повеќе за приказната зад нашето знаме, пасоши и пари“, раскажуваат жители на Вевчани за Би-би-си.
Фото: Ричард Колет
