Во Битола синоќа се одржа четвртото издание на меѓународниот бодибилдинг натпревар „Паљо Класик Опен 2026“. Настанот годинава имаше и хуманитарен карактер: средствата од продажбата на влезниците ќе бидат донирани на семејството на прерано починатиот спортист Зоран Петковски.
На натпреварот присуствуваа градоначалникот Тони Коњановски и претседателот на Советот на Општина Битола, Бојан Бојкоски. На сцената настапија бодибилдери и фитнес натпреварувачи од Македонија, Црна Гора, Србија, Албанија и Косово. Мажи и жени се натпреваруваа во повеќе категории, а настапите ги оценуваше десетчлено судиско жири.
„Паљо Класик Опен“ го организира „Фитнес Паљо“, клуб што работи во Битола повеќе од три децении и низ кој поминале над 17.000 членови. Зад создавањето и развојот на клубот стои Зоран Паљо Лазаровски.
На настанот присуствуваше и претседателот на Федерацијата на бодибилдинг и фитнес, Бобан Ѓороски, а пред присутните се обрати поранешниот претседател на федерацијата, Антонијо Димитровски.
Публиката и учесниците со едноминутно молчење му оддадоа почит на Зоран Петковски. Коњановски им посака успешен настап на натпреварувачите, истакнувајќи го значењето на настан што ги поврзува спортот, долгогодишната традиција и хуманоста.
