Градоначалникот на Прилеп, Дејан Проданоски, денеска присуствуваше на првиот академски час на Економскиот факултет, каде што на новите студенти им посака успешен почеток на академската година.
Обраќајќи им се на студентите, Проданоски рече дека пред нив започнува важно поглавје во кое ќе стекнуваат знаења, ќе ги развиваат своите способности и ќе се подготвуваат за идните професионални предизвици.
Тој ја истакна улогата на Економскиот факултет во развојот на Прилеп, посочувајќи дека низ децениите од него излегле генерации млади луѓе кои со својата работа придонеле и за градот и за државата.
Проданоски ги повика студентите да веруваат во своите способности и предизвиците да ги искористат како можност за напредок. Според него, нивните идеи, знаење и енергија се значајни за иднината на Прилеп.
Градоначалникот посочи дека Општина Прилеп ќе продолжи да ја поддржува младата генерација. Како дел од таа поддршка, и оваа академска година се обезбедени награди за најдобрите студенти, како признание за нивниот труд, успех и посветеност.
На крајот, на студентите им посака година исполнета со нови знаења, лични достигнувања и убави студентски денови.
