Српската пејачка Марија Шерифовиќ по пет години пауза објави нова песна, „Добар ви ден“. Песната ја напиша Леонтина Вукомановиќ, а аранжманот е на Дарко Димитров. Со песната Марија промовира и видео, кое за еден ден има скоро еден милион прегледи на Јутјуб.
„Добар ден пропаднати луѓе, што планирате за денес, да плукнете некого в лице? Каде ви се соништата, празна вреќа, сè се мери на грам, живот, љубов, тага и среќа, кога животот изгледа како проба, ебено доба“, пее Марија во песната, за која вели дека е посветена на светот кој наликува на џунгла, полн со хаос, неправда и лаги, каде што нема милост и разбирање за незаштитените и добрите луѓе.
Марија пред неколку месеци откри дека работи на нов албум со Дарко Димитров и неколку пати во текот на годината објави видеа од снимањето на песните во неговото студио. Таа вели дека албумот ќе го промовира на есен следната година.
