Со три часа музика, гости и емотивни обраќања, Калиопи синоќа во преполната Арена „Борис Трајковски“ одбележа половина век на сцената. Еден од највпечатливите моменти беше нејзината порака пред изведбата на „Волчица“ („Вучица“) – песната за која смета дека нејзиниот долгогодишен соработник Ромео Грил најдобро ја опишал.
„Убави мои, и кога мене ќе ме нема, сакам да ме паметите по оваа песна“, им порача пејачката на присутните, пренесува САКАМДАКАЖАМ.МК.
Концертот на 17 октомври беше нејзино второ исполнување на скопската Арена, по настапот во октомври 2024 година. Во меѓувреме, Калиопи одржа четири акустични концерти во Филхармонијата, како и настапи во Хераклеја во Битола и во Античкиот театар во Охрид.
На публиката ѝ раскажа дека се прашувала дали по толку концерти е можен уште еден голем собир во Скопје, но охрабрувањето од продукцијата „Прагма“ ја убедило повторно да излезе пред скопската публика.
Вечерта почна со побрзи песни и танцување, а баладите во средишниот дел ја претворија салата во море од светилки од мобилни телефони. На новата песна „Бебе“ ѝ се придружи детскиот хор „Пиколо“.
Јубилејот ја врати Калиопи и кон почетоците: во 1976 година, како десетгодишно девојче, настапила на „Златно славејче“ во Универзалната сала со „Мојата учителка“.
Таа потсети дека годинава одбележува 50 години музика, а на крајот на декември ќе наполни 60 години. На шега објасни дека тајната на нејзината младешка енергија е токму публиката.
Посебно место имаа и семејните посвети. „Како солза“ ја испеа за брат ѝ Томче, кој ѝ замерил што ја изоставила на претходниот концерт, а ја поздрави и сестра ѝ Корнелија. „Месечина“, напишана за синот Пако, ја претстави како песна што им припаѓа и нејзе и на слушателите.
Дуетот „Остани во мене“, снимен со Ромео Грил во 1986 година, овојпат го изведе со гитаристот Танче Гроздановски и публиката.
Специјален гостин беше Слаткаристика, со кого ги испеа новата верзија на „Обои ме“, дуетот „Води ме“ и неговиот хит „Да полетам“. Двајцата ја поздравија Каролина Гочева, која го следеше концертот од публиката.
На сцената се појави и основецот Никола од Скопје со „Македонско девојче“. Калиопи го исполни ветувањето што му го дала откако зад сцената на ланските концерти ѝ ја испеал песната.
Во изборот од македонски евергрини се најде „Бакни ме“ од Сашка Петковска. Со неа го поздрави Дуке Бојаџиев, во чест на неговиот татко, композиторот Тодор Бојаџиев. На видеобимот премиерно беше прикажана и новата песна „Лага“ („Лаж“), дело на Ромео Грил.
Тричасовниот концерт заврши на бис со „Бато“ – регионалниот евергрин создаден во 1988 година, за време на турнејата на Калиопи и Ромео Грил низ тогашниот Советски Сојуз, инспириран од Белите ноќи.
