Американскиот милијардер, бизнисмен и визионер Илон Маск тврди дека до 2050 година во секој дом ќе има хуманоиден робот. Во неодамнешното интервју рече дека неговата компанија „Тесла“ развива технологија за самоуправување и ја пренесува својата работа на роботиката.
Истакна дека во блиска иднина повеќето домови ќе имаат хуманоиден робот. Како услов го наведе напредокот на технологијата за вештачка интелигенција.
„Додека го решавате проблемот со технологијата за вештачка интелигенција за автомобили, кои всушност се роботи на тркала, решението можете да го генерализирате и за роботите на нозе“, рече Маск.
Го истакна и фактот дека компаниите како Boston Dynamics покажле потенцијал во развој на хуманоидни роботи, но посочи и дека сè уште не сме многу блиску до користење на AI-технологијата за да им помогнеме на домаќинствата.
Нагласи и дека светот ќе мора да работи напорно за да избегне дистописко сценарио кога е во прашање технологијата на вештачка интелигенција. Маск рече дека неговата компанија Neuralink е делумно основана со цел да се ублажи заканата од AI-технологијата.
Американскиот бизнисмен рече дека локализираниот ROM-чип, кој нема можност за ажурирање over the air, може да помогне во одржувањето на безбедноста, вклучително и способноста роботот да ја препознае командата и да ги прекине тековните активности кога некој тоа го бара од некое лице. Тој исто така додаде дека треба да има регулаторна агенција за технологијата на вештачка интелигенција.
Маск верува дека хуманоидниот робот првин ќе извршува опасни и здодевни работи, кои човекот не сака да ги прави, а потоа ќе стане понапреден и тоа ќе му овозможи да се грижи за луѓето, да подготвува оброци, да го коси тревникот и многу повеќе.
