Можноста огромен астероид еден ден да удри во Земјата со децении претставува една од најголемите грижи на научната заедница. Сега, кинески истражувачи претставија сценарио кое наликува на научнофантастичен филм, но според нивните анализи, токму таквиот пристап би можел во иднина да го спаси човештвото од катастрофални последици.
Во својата студија тие предлагаат употреба на нуклеарни експлозивни направи за уништување на таканаречените „астероиди на судниот ден“ – вселенски тела доволно големи за да предизвикаат разорувања од планетарни размери доколку удрат во Земјата.
Истражувањето доаѓа во период кога НАСА предупредува дека во Сончевиот систем би можеле да постојат околу 15.000 сè уште неоткриени астероиди со пречник од неколку стотици стапки. Ваквите објекти се доволно големи при удар целосно да уништат градови и да предизвикаат огромни последици.
Според кинеските научници, во екстремно сценарио би можело да се употреби нуклеарна експлозија со сила споредлива со повеќе атомски бомби фрлени врз Хирошима.
Во научниот труд тие нагласуваат дека намалувањето на ризикот од удар на астероиди кои се движат во близина на Земјата е од клучно значење за глобалната безбедност и опстанокот на човечката цивилизација.
Истражувачите предупредуваат дека особено опасни се големите астероиди кои би биле откриени непосредно пред можниот судир со Земјата.
„Директното уништување или брзото менување на траекторијата на опасниот објект изгледа како единствениот изводлив начин за одбрана на планетата во екстремни ситуации“, наведуваат авторите на истражувањето.
Тие потсетуваат дека во далечното минато удари на астероиди веќе предизвикале катастрофални климатски промени и масовни изумирања на живиот свет.
„Тоа претставува една од најголемите можни закани за човештвото и затоа е тема од глобален интерес“, истакнуваат научниците.
Дополнителен проблем, според нив, е што во некои случаи предупредувањето би можело да биде само неколку дена или недели пред ударот, оставајќи многу малку време за реакција.
За разлика од претходните идеи, кинеските истражувачи предлагаат нуклеарната направа да не експлодира во близина на астероидот, туку да биде поставена во неговата внатрешност.
За да ја тестираат оваа концепција, тие спровеле детални компјутерски симулации. Според резултатите, внатрешната експлозија би го распарчила астероидот многу поефикасно отколку детонација над неговата површина.
Во симулациите биле користени виртуелни астероиди кои се движеле кон Земјата со брзина од околу 9,7 километри во секунда.
Резултатите покажале дека нуклеарна експлозија со сила од 300 килотони би можела целосно да уништи астероид со пречник од околу 50 метри. За значително поголем астероид со дијаметар од околу 100 метри би била потребна експлозија со јачина од приближно три мегатони за да се распадне на помали фрагменти.
„Одбраната на Земјата од удари на астероиди отсекогаш претставувала еден од најголемите предизвици на современата астронаутика“, наведуваат истражувачите.
Тие додаваат дека истражувањата во оваа област се неопходни за да се обезбеди долгорочниот опстанок и развој на човештвото.
Сепак, научниците предупредуваат дека практичната реализација на ваква мисија би била исклучително сложена.
Пред сè, потенцијално опасниот астероид мора да биде откриен доволно рано за да има време да се испланира и реализира целата операција пред неговото приближување кон Земјата.
Дополнително, би било неопходно развивање напредно вселенско летало кое би можело да транспортира опрема за дупчење, како и нуклеарната направа, на голема оддалеченост во вселената и со висока прецизност да ја постави во внатрешноста на астероидот.
И покрај бројните технички и инженерски предизвици, авторите сметаат дека нивниот концепт има значителен потенцијал во идните системи за планетарна одбрана.
Според нивниот заклучок, ваквиот пристап има „длабоко стратешко значење за зголемување на способноста на човештвото да одговори на заканите што ги претставуваат ударите на астероиди и да ја заштити планетата од можни катастрофални последици“.
