Холивудскиот актер Џон Џејмс, најпознат како Џеф Колби од „Династија“, се повреди на снимањето на новиот филм во Белград и е пренесен во болница. Актерот во Србија го снима филмот за животот на Хантер Бајден, синот на американскиот претседател Џо Бајден. Џејмс, кој во филмот го игра Џо Бајден, изјави дека е добар и дека добил врвен третман во белградскиот Ургентен центар.
„Влегов во ресторан и се удрив во стаклена врата. Имав голема исеченица над окото и крвавењето беше обилно. Се вратив во хотелот, а менаџерот ме одведе во ургентниот центар. Беше сабота вечер и како и секоја сабота во секој ургентен центар во светот, беше вистинска лудница. Но, добив врвен третман и неколку конци над окото, па се враќам на снимањето“, рекол Џејмс за „Дејли мејл“.
Филмот за контроверзниот син на американскиот претседател го снимаат ирските продуценти Фелим Мекалиер и неговата сопруга Ен Мекелини. Тие велат дека филмот е начин да се истражи како Хантер Бајден собрал десетици милиони долари од странски компании во сопственост на олигарси и да се расветли контроверзните односи меѓу Хантер, неговиот татко и другите членови на семејството Бајден.
John James is okay.
He got in a little accident off set but all is okay. The show must go on! 🙏🏻https://t.co/resOxyUzMA
— “My Son Hunter” The Hunter Biden Movie (@MySonHunter) November 15, 2021
Џејмс претходно за филмот рече дека сценариото има сè, пари, моќ, алчност, секс, дрога и алкохол.
„На некој начин ме потсетува на „Династија“. Тоа е приказна за љубовта на таткото кон синот и покрај неговите големи маани, но и приказна за внатрешниот поглед на светот на политиката“, изјави Џејмс.
Режисер на филмот е актерот Роберт Дејви. Хантер Бајден го игра британскиот актер Лоренс Фокс. Снимањето на филмот, чиј буџет е 1,8 милиони долари, започна во Србија кон крајот на октомври и ќе трае четири недели.
