Зградата на имотот Алторп, каде што принцезата Дијана го поминала детството, била запалена, а се сомнева дека пожарот бил подметнат, потврди нејзиното семејство.
Селската куќа на поранешниот семеен имот на принцезата Дијана изгорела во пожар за кој се сомнева дека е подметнат, изјави нејзиниот брат, грофот Спенсер, според „Скај њуз“.
Тој сподели фотографии од зградата во пламен и нејзините уништени остатоци на социјалните мрежи следниот ден наутро, велејќи дека бил „изненаден“ кога дознал дека куќата „очигледно била запалена од вандали“.
Тој им се заблагодари на пожарникарите кои, како што изјави, „направиле сè што можеле“ и додаде дека „многу е тажно што некој мисли дека нешто вакво е забавно“.
Пожарникарите биле повикани на местото на настанот околу 1:30 часот наутро во средата и ја пронашле напуштената двокатна зграда целосно зафатена од пламен, соопшти Противпожарната и спасувачка служба на Нортхемптоншир.
„По пристигнувањето, пожарникарите пронајдоа напуштена двокатна зграда целосно во пламен. Во моментот на најголемата интервенција, четири екипи од различни делови на службата, користејќи апарати за дишење, користеа млазници со вода за да го локализираат пожарот и да спречат негово понатамошно ширење“, се наведува во соопштението.
Една противпожарна екипа остана на терен до попладнето, заедно со цистерна за вода, за да продолжи со санацијата на преостанатите жаришта, а потоа се вратија во станицата кратко пред 13 часот, велат надлежните.
