Француската филмска икона и активистка за права на животните, 91-годишната Брижит Бардо, е хоспитализирана веќе три недели во приватната болница „Сен-Жан“ во Тулон, во јужна Франција. Легендарната актерка е во болница недалеку од нејзиниот дом во Сен Тропе, објави „Ил Месаџеро“.
Според извештаите на регионалните медиуми, Бардо се соочува со сериозни здравствени проблеми и е „оперирана поради сериозна болест“. Иако се очекува да ја напушти болницата за неколку дена, нејзината состојба останува „загрижувачка“.
Брижит Бардо е родена на 28 септември 1934 година во Париз, во богато семејство. Како дете, таа посетувала часови по балет и ја започнала својата кариера како модел како тинејџерка. Своето филмско деби го имаше во 1952 година, но светска слава постигна во 1956 година со филмот „И Бог ја создаде жената“ (Et Dieu… créa la femme), што ја направи симбол на женската слобода и сексапил во 1950-тите.
За време на нејзината кариера, Бардо глумеше во повеќе од педесет филмови и стана икона на француското кино, како и глобален секс симбол кој ја обележа популарната култура. Често соработуваше со режисерот Роже Вадим, кој беше нејзин прв сопруг од 1952 до 1957 година. По него, се мажеше уште три пати – со актерот Жак Шарие, со кого го доби синот Никола, во 1960 година; потоа со милионерот Гинтер Сакс, познат по својот гламурозен начин на живот; и конечно со политичарот Бернар д’Ормал, со кого е во брак од 1992 година.
