Ејми Вајнхаус, една од најголемите светски ѕвезди, почина на 23 јули 2011 година на 27 години, а зад себе остави бројни хитови кои се слушаат и денес.
Нејзиниот албум Back to Black е најпродаваниот албум на векот, и освои пет Греми и засекогаш ја зацврсти во ѕвезда. Ејми, покрај нејзиниот фантастичен вокал, за жал беше позната и по бројните скандали, кои најмногу беа резултат на нејзиниот неуреден живот и борбата со зависноста.
Нејзината иконска песна Rehab е создадена сосема случајно во студиото додека таа му се жалела на својот продуцент дека родителите и пријателите ја принудуваат да започне лекување од зависност од алкохол. Последниот концерт пејачката го одржа во Белград, а траеше само 11 минути бидејќи не можеше да пее ниту да стои. Откако беше исвиркана од толпата, Ејми се повлече од сцената и ја заврши својата европска турнеја.
Бројни проблеми со алкохолот и дрогата
Таа е родена на 14 септември 1983 година како второ дете во еврејско семејство кое живее во Западен Лондон. Нејзините родители се развеле кога таа имала само девет години, а таа и нејзиниот брат продолжиле да живеат со нивната мајка и баба.
На тринаесет години се запишала во престижната театарска школа Силви Јанг во Лондон, каде покажала исклучителен талент. Таа стана позната со нејзиниот деби албум Френк во 2003 година. Нејзиниот втор албум, Back to Black, и освои пет Греми. Тој албум вклучуваше еден од нејзините најголеми хитови, Rehab, кој ги опишува нејзините проблеми со дрогата и алкохолот и одбивањето на каква било помош за лекување на зависностите.
На почетокот на 2005 година, таа го запозна Блејк Филдер Цивил, кој ќе стане нејзин сопруг. Нивната бурна врска ги наполни колумните во весниците, а се зборуваше дека токму тој ја вовел Ејми во светот на потешките дроги, а во една прилика таа за малку ќе умрела во неговите раце по три дена континуирано пиење.
“Бев сигурен дека ја гледам како умира. Ја држев до себе и мислев дека умира во моите раце. Некако успеав да и ја отворам устата и да и дишам воздух во грлото. Потоа таа се затресе и видов како градите се креваат”, изјави тој за медиумите.
Тие се разведоа во 2009 година по две години брак. Во 2010 година, Ејми стапи во врска со режисерот Рег Тревис и се чинеше дека ќе може да се смири со него, но по раскинувањето се врати на старите пороци.
„Таа се радуваше на иднината“
Нејзината последна европска турнеја беше откажана по неуспешниот концерт во Белград на 18 јуни 2011 година. Пејачката беше толку под дејство на опијати што едвај издржа, а разочараните обожаватели ја исвиркаа.
Нејзиното последно појавување во јавноста беше во Камден, Лондон на 20 јули 2011 година, кога таа се појави изненадувачки на сцената за да ја поддржи нејзината кума Дион Бромфилд. Таа почина кратко потоа, на 23 јули 2011 година.
Околу 10 часот тоа утро во собата влегол нејзиниот чувар Ендрју Морис и ја нашол во кревет. Мислеше дека спие па ја напушти собата. Бидејќи таа не излегла до 15 часот, тој решил уште еднаш да ја провери. Кога влегол во собата, сфатил дека таа во меѓувреме не се мрднала.
Сфатил дека не дише и повикал брза помош. Лекарите можеле само да констатираат смрт, а во собата биле пронајдени три празни шишиња вотка. Обдукцијата покажала дека таа во крвта имала пет пати поголема количина на алкохол од дозволеното.
Ноќта пред да умре, таа рече дека не знаела дали некогаш ќе престане да пие, но „не сакала да умре“. „Таа се радуваше на иднината“, рекол нејзиниот лекар. Ноќта пред да умре, таа гледаше телевизија и слушаше музика, изјави Морис. По нејзината смрт, нејзините родители основале фондација на нејзино име за да им помага на луѓето во лекувањето од зависности.
