Веднаш по објавувањето на видеото на социјалните мрежи, за кое авторот тврди дека е од градинката „Детска радост“ во Гевгелија, а на кое се слуша како воспитувачка навредува мало дете кое плаче без престан, Министерството за труд и социјална политика итно реагираше за, како што велат, расветлување на случајот во најкраток можен рок, пишува Макфакс.
„Одделението за инспекциски надзор за заштита на децата веднаш стапи во контакт со директорот на установата, а инспектори се упатени на терен за да извршат вонреден инспекциски надзор. Доколку се потврди веродостојноста на случката, сите одговорни ќе бидат веднаш санкционирани. МТСП нема да толерира какво било несоодветно однесување со децата во градинките. Во најбрз рок ќе ја известиме јавноста за наодите и следните чекори во однос на овој случај“, велат од МТСП.
Авторот на видеото тврди дека плачењето на детето траело два часа, а пак, воспитувачка му се обраќала со зборовите „кучко“ и „краво“.
„Не знам колку се слуша, но еве што се случува зад грбот на родителите од многу искусните вработени во градинките. Плачењето траеше два часа, а таа наместо да ги смири им се обраќаше со кучко една, краво и што уште не. Не знаев дали да влезам и да ја утепам, што попрво да направам. Срце ми се распарчи, мали деца да трпат таква тортура. Страшно и безобразно. Инаку, градинката се наоѓа во Гевгелија на улицата Илинденска“, напиша во описот авторот на видеото, кое беше споделено на социјалната мрежа „Фејсбук“.
