Сочен пица-ролат

Потребни состојки за тестото:

1 лажичка сув квасец
1 голема лажица шеќер
180 мл топла вода
1 лажичка сол
½ лажица маслиново масло
300 грама брашно

Потребни состојки за филот:

200 грама кашкавал
300 грама салама
1 блага пиперка
2 лажици маслиново масло
1 лажичка италијански микс од зачини (бибер, нане, оригано, лук, босилок, сушен кромид, сушен магданос, семе од целер)

Начин на подготовка:

Измешајте ги топлата вода, квасецот и шеќерот. Мешајте додека не се растворат состојките. Оставете ја смесата да отстои 5 минути. Потоа додадете ги маслиновото масло и солта и префрлете ја целата смеса во голем сад каде што ќе додадете 1/3 од брашното. Измешајте додека не се изедначи. Продолжете да додавате брашно сè додека тестото веќе не можете да го мешате со лажица. Потоа префрлете го тестото на набрашнета површина и месете го околу 5 минути, постојано додавајќи брашно. Месете и додавајте брашно додека тестото престане да лепи, но притоа да остане меко.Треба да употребите приближно 250-300 грама брашно вкупно. Направете топче од тестото и ставете го пак во садот, покриено со пластична фолија. Оставете го да стои 1-1,5 час, односно додека да порасне двојно.

Штом тестото е доволно нараснато, префрлете го повторно на набрашнета површина и од него формирајте неправилен правоаголник. Потоа истегнете го за да добиете поголем правоаголник (околу 30 на 45 см). Тегнете го наместо да го сукате со сукало за да добиете помека кора на крајот. Ставете ги сите состојки за филот и завиткајте го тестото по должина на правоаголникот. Свиткајте го како ролат и ставете го ролатот во тавче обложено со хартија за печење. Одозгора поминете го со четка со останатата количина маслиново масло. Додадете ги зачините и оставете го ролатот да нарасне уште еден час. Загрејте ја рерната на 200 степени. Печете 25 минути или додека горниот дел од ролатот да добие златно-кафена боја. Послужете го ролатот топол.

Scroll to Top