Коалицијата ВЛЕН со ново соопштение упати остри обвинувања кон лидерот на ДУИ, Али Ахмети, тврдејќи дека неговото родно село Зажас останало без канализациска мрежа во текот на 24 години додека партијата била на власт.
Од ВЛЕН оценуваат дека е „иронично“ што, иако ДУИ со години располагала со министри, директори, општини и милиони евра, не успеала да реализира еден од основните инфраструктурни проекти во селото.
Во партиското соопштение се наведува дека со отворањето на нови информации околу проектот се појавуваат сè повеќе сомнежи за начинот на кој биле трошени европските средства. Според ВЛЕН, додека граѓаните чекале изградба на канализација, други, како што велат, имале корист од исплати и договори поврзани со проектот.
Коалицијата поставува прашања кој профитирал од проектот, кои компании биле вклучени, кој ги одобрувал исплатите и дали истрагата ќе ги опфати сите инволвирани лица.
„Албанците заслужуваат да ја знаат вистината. Заслужуваат да знаат каде завршиле милионите евра, кој имал корист од проектот и зошто Зажас 24 години остана без основна инфраструктура“, наведуваат од ВЛЕН.
Од коалицијата порачаа дека Зажас повеќе нема да биде „заложник на неисполнети ветувања“ и дека ќе инсистираат истрагата да биде целосно спроведена.
„Бараме да се отворат сите договори, исплати, компании и сите можни политички, бизнис и семејни врски. ДУИ зад себе остави долгови и сомнежи, а сега мора да сноси одговорност“, се наведува во соопштението на ВЛЕН.
