Борис и Билјана Димови снимија нов музички проект со група „Астрион“. Тие снимија емисија во која испеаја неколку познати фолк-хитови и подзаборавени македонски песни, но и две авторски песни. Нивната цел е да ги оживеат малку подзаборавените македонски песни.
„Заедно со оркестарот одбравме песни што не се многу пеени или популарни. Целта ни е да ги разбудиме овие песни што се малку оставени настрана, па затоа решивме да направиме десетина песни во наш аранжман, ги отпеавме и отсвиривме во живо. Мислам дека гледачите ќе бидат задоволни“, вели Борис.
Димови се надеваат дека публиката ќе ужива во овие песни и дека гледачите одлично ќе го прифатат проектот снимен во соработка со „ИН продукција“.
„Очекуваме многу. Песната ‘Чифте пајтон’ од Гоце Арнаудов беше заборавена, исто како и неговата песна ‘Злато си ми ти’, прекрасна, а заборавена. Затоа со Билјана решивме да направиме и дуети. Самите гледачи ќе одлучат дали проектот вреди или не“, додаде тој.
