Вечерва со почеток од 20 часот во Музејот на град Скопје, ќе се одржи мултимедијален настан, во пресрет на 60 годишнината од одбележувањето на катастрофалниот скопски земјотрес во организација на музичката платформа „Терапија“.
Настанот ќе обедини повеќе уметности: музика, слика, филм, визуелна уметност. Зад оваа организација стои и Тренчева Ботовача Слободанка, заедно со платформата Терапија, кои за овој проект ја дадоа својата идеја и посветеност .
“Во пресрет на 60 годишнината од одбележувањето на катастрофалниот скопски земјотрес, платформата „Терапија“ подготвува навистина уникатен настан кој ќе се одржи во нашето Скопје. Старата Железничка станица, денеска Музејот на град Скопје ќе биде јавниот простор кој ќе обедини повеќе македонски уметници, DJ артисти, изведувачи, претставници на филмот, фотографијата и сл., кои ќе не потсетат на старо Скопје, но и ќе го трасираат патот понатаму. Имено, предвидена е изложба на тројцата истакнати македонски уметници: Михаил Корубин, Антони Мазневски и Велимир Жерновски. Преку своите дела, тие ќе „зборуваат“ за уметноста во Скопје, за нивната перцепција за овој град и емоциите кој истиот ги буди кај сите нас“, вели Боте. На мултимедијалниот настан ќе се прикажат и филмовите „Мирно лето“ и „Мементо“. Исто така, на визуелен начин ќе бидат презентирани сегменти од весници и медиуми кои известувале за постземјотресно Скопје. Музичкиот дел ќе биде исполнет со перформанс на Тамара Тодевска, која ќе не потсети на некои од најдобрите македонски поп – песни, кои и денеска будат емоција и се дел од колективната меморија на различни генерации – скопјани.
„Многумина ќе се спротистават на славењето на природна катастрофа, која земала многу животи и уништила илјадници домови, јавни објекти и установи. Но, ние ги истакнуваме вредностите кои се случија по оваа непогода во 1963 година. Солидарноста, хуманоста, емпатијата како основни водилки, кои придонесоа Скопје повторно да се изгради и да стане метропола. Токму овие вредности очајно ни фалат денеска. Токму овие вредности недостасуваат на Скопје, на луѓето, на сите ентитети кои сакаат поубав град и поквалитетен живот.“ – велат претставниците oд музичката платформа „Терапија“
Тие ги покануваат сите граѓани, да дојдат на 26 јули во Музејот на град Скопје, од 20:00 часот и сите заедно да зборуваме за чист и урбан град, за град кој е дом на сите генерации, за вистинска култура, сцена и ноќен живот. Да зборуваме и да работиме за Скопје.
Настанот се организира со поддршка на: Министерство за култура, Град Скопје, Делегација на ЕУ во Скопје и BWI.
