Музичкиот состав Фантастик бенд неодамна ги заврши снимањата на видеозаписите за нивните авторски песни: „Млад на печалба“ и „Ајде брате на наздравиме“.
Снимањето е направено на повеќе локации низ гостиварско, а во нив има педесетина статисти. Според сценариото двата спота се една приказна која има две продолженија, односно „Ајде брате да наздравиме“ се надоврзува на песната и спотот од „Млад на печалба“.
Авторот на видеото ја реализира замислата за приказна во која еден од двајцата браќа заминува на печалба. Тој во првиот дел, остава мали дечиња и жена, додека во вториот спот, помалиот брат му праќа покана за свадба и тој се враќа дома.
Новото видео може да се види на телевизиите и на сателитската ИН Тв кои ја негуваат македонската музика. Наскоро се очекува да биде завршен и постпродукцискиот дел за вториот спот. Инаку и двата изобилуваат со кадри од македонската традиција, печалба, свадба и други адети, а нив ги изработи и снимаше ИН продукција.
