Авторот на бестселери, Зоран Спасов-Ѕоф, во средата ја промовираше својата нова книга „Цепај сине“. И овој пат, исто како и лани, кога ја промовираше „Џабе живиш у Скопје“, клубот беше претесен да ги собере сите кои дојдоа на промоцијата која беше вистинска журка за скопјани.
Голем број пријатели, јавни личности, музичари, бизнисмени, беа дел од забавата на Спасов-Ѕоф. Чест му направи и претседателот Стево Пендаровски, кој дојде на промоцијата, и онака опуштен уживаше во друштво на пријатели.
„ Писателе, пушите луле“, му рече на врата Пендаровски на Ѕоф, кој го пречека пред промоцијата.
Во улога на водител беше актерот Александар Микиќ, кој нарекувајќи го Ѕоф, современ Цепенков, на свој начин ја долови приказната на „Цепај сине“ читајќи по некој дел од книгата која ги интригира читателите, особено скопјани, кои со аплауз го поздравија Микиќ.
А, Ѕоф пак за својата книга вели: „Стануе збор за еден цепенковистички зборник што кај читателот треба да побуди шегобијни чу’ства, осеќаји, сенсои и филинзи. Ќе прочитате ствари што нит‘ сте ги чуле нит‘ сте ги виделе. За некои ќе треба да ги прашате вашите родители, доста од нив не постојат ни на ’Гугл‘, а најголемиот дел се непознати чак и за Институтот за македонски јазик. Но, едно е сигурно – или ќе ’цепате‘ или (нема да) живеете“.
Гости на вечерта беа, прво Цеки, кој ја отепа култната „Џабе живиш у Скопје“, журка добра имаше со групата „The Ringtones“, но најголемата забава ја направи легендарниот Драган Мијалковски, кој заедно со гостите ги пееше неговите најпопуларни песни.
Во целата таа драма од луѓе, забава, музика, пијачки, имаше и паѓање во бесвест, ама во буквална смисла, оти на неколку пати интервенираше и Итната медицинска помош. Многу луѓе, голема забава, каде немаше место ни игла да фрлиш.
“Пак цело Скопје се собра на промоција кај Ѕоф“, коментираа гостите барајќи место каде да застанат.
„Цепај сине“ е во издание на „Попули“, дел од „Арс Ламина – публикации“. Се работи за толковен речник во манирот на претходната книга на Зоран Спасов-Ѕоф – „Џабе живиш у Скопје“.
Во оваа книга се застапени две илјади поими, изрази и фрази што на шеговит начин ги претставуваат нашиот хумор и менталитет. Целта на авторот е да го реактуализира скопскиот јазик и кај читателите да разбуди некои одамна заборавени чувства.
Средствата од продажбата, како и досега, Зоран Спасов-Ѕоф ќе ги донира во хуманитарни цели. На оваа ѝ претходат уште пет хит-книги: „Џабе живиш у Скопје“, „Торонто експрес“, „Тито, мојот претпоследен херој“, „Некогаш, некаде“ и „Тибам штркот“.
Александра Георгиев
