Со песната „За овој свет“ од Тоше Проески, македонскиот виртуоз на пијано, Симон Трпчески, ги поздрави своите обожаватели од целиот свет и им испрати порака да се чуваат во времето на коронавирусот. Во видео пораката на македонски и англиски јазик, тој вели дека „среда е среќен ден, создаден за убави нешта“.
„Да бидеме позитивни, да се надеваме само на убави нешта набрзо и да го победиме вирусот!“, рече тој, па отсвире класично дело од Сергеј Прокофјев, но и популарната песна од Тоше, од неговиот албум „Ден за нас“.
И Симон, како најголемиот дел светски музичари, ги одложи концертите закажани за овој период. Тој рече дека штом помине светската пандемија, повторно ќе се дружи со неговата публика и дека ќе има уште многу концерти.