По три незгоди на крај завршив во болница, вели Васил Гарванлиев, кој промовираше нова песна

Пејачот Васил Гарванлиев ја промовираше новата песна „Приказна“, заедно со спотот што се снимаше на неколку локации во Охрид. И на секоја од тие локации Васил доживеал незгода, а на крајот завршил и во болница.

„Спотот го снимавме три дена, на изгрејсонце и на зајдисонце. Сменивме неколку локации, ама на секоја локација ми се случи по една незгода. На Св. Наум паднав и го набив рамото; трчајќи низ шумите над Канео, кон Плаошник, паднав и ја шинав ногата; кога скокав од карпата на Трпејца под притисок ми се затна увото и ми се воспали, па на крај завршив во болница. Додека снимавме на Трпејца, се ‘запознав’ и со неколку змии“, ни раскажа Васил за „Репортер“.

Вели дека е презадоволен од спотот и дека со целата приказна испраќа пораки за борбата во и со себе, за тоа што ни се случува во моментов, а носи и заштитна маска против корона во некои од сцените.

„Секој дел од спотот е осмислен така што ќе испрати некоја скриена порака. Сакав ова видео да биде поавангардно, а тоа е доловено преку облеката и впечатливиот накит што го носам“, додава тој.

Ова e втор проект на Васил годинава, по песната You, со која требаше да настапи на Евровизија во Ротердам. Тој самиот е автор на музиката, текстот е на Тања Брковска, а аранжманот е на Давор Јордановски. Видеото го направи “Дигитал бокс продукција“ во соработка со Ристе Филипов и креативниот директор Јелмаз Дервиши.

„Приказна“ е дел од новиот албум на Васил, продолжение на „Ѓердан“ и You. Албумот е во завршна фаза и треба да биде објавен оваа есен.

Scroll to Top