Еден од најпопуларните бендови изминатите години, „Ил диво“, вечерва ќе одржат концерт во арената „Борис Трајковски“ во Скопје. Ова ќе биде нивно прво гостување во Македонија. Концертот е дел од нивната светска турнеја, а во чест на Карлос Марин, еден од пејачите во бендот кој почина лани во декември од корона.
„Решивме да ја продолжиме турнејата и да пееме за Карлос, бидејќи музиката беше негов живот. Го сакаа милиони фанови ширум светот и ние имавме среќа и чест што можевме да настапуваме со него толку многу години. Длабоко ќе ни недостасуваат неговата разиграност, пријателство и брилијантен глас“, рекоа останатите тројца членови во најавата за турнејата.
Во „Ил диво“ пеат Американецот Дејвид Милер, Французинот Себастијан Изамбард и Швајцарецот Урс Булер. Тие, заедно со Марин го основаа бендот во 2003 година и се прославија со преработки на светските хитови во оперски и класичен стил. На концертот во Скопје, тие ќе ги испеат своите најголеми хитови, а специјален гостин ќе биде мексиканско-американски баритон Стивен ЛеБри.
