Ѓаволското море, јапонското Ма-но Уми, исто така познато како Змејски триаголник, е област во Тихиот Океан околу јапонскиот брег и островот Огасавара што опфаќа добар дел од Филипинското Море.
Лежи директно спроти Бермудскиот триаголник и се смета за негов пацифички пандан. Згора на се, забележани се и активности во таа област кои тешко се објаснуваат.
Пред неколку илјади години Кинезите верувале дека во тоа море живее монументален змеј, кој ги влече бродовите на дното за да го нахрани гладот. Затоа, не е чудно што исчезнувањето на бродовите во Ѓаволското Море денес многумина му го припишуваат на тоа митско суштество. Постојат приказни за тоа како големиот монголски водач Кублај Кан се обидел да ја нападне Јапонија во 13 век, но изгубил 40 илјади луѓе токму во триаголникот на змејот. Во текот на 19 век, многу морнари пријавиле ненадејно појавување на мистериозна дама на нивните едрени бродови.
Сепак, најпознатата приказна датира од 1952 година, кога во месец септември исчезна истражувачкиот брод Каио Мару Но.5 со цел екипаж од 31 лице. Истражувачите ја истражувале активноста на подводниот вулкан Миоџин-шо и никогаш не се вратиле дома. Според книгата „Змејовиот триаголник“ на Чарлс Берлиц од 1989 година, јапонската војска изгубила пет бродови со околу 700 луѓе во оваа област од 1952 до 1954 година, поради што јапонското Министерство за поморски работи и рибарство го прогласило за опасно во средината на минатиот век.
Што навистина се случило со исчезнатите луѓе и бродови никогаш не е целосно разјаснето, како во случајот со Бермудскиот триаголник. Науката тврди дека не се работи за паранормална активност, туку за постоење на заробени количини опасни гасови на морското дно. Поточно, станува збор за наоѓалишта на метан клатрат, кој на температура повисока од 18 степени Целзиусови може да предизвика неверојатна експлозија и да потоне бродови без никакви остатоци или докази.
