Британскиот бенд „Секс пистолс“ повторно ќе ја издаде контроверзната песна „Боже чувај ја кралицата“ по повод платинестиот јубилеј на Елизабета Втора, односно за 70-годишнината од нејзиното владеење со земјата.
Песната е оригинално објавена во 1977 година во текот на сребрениот јубилеј откога Елизабета дојде на британскиот трон. Оригинално со наслов „Нема иднина“, песната не се однесува толку на кралицата колку што е социјална критика на Британија, која на крајот на 70-тите години беше во лоша економска ситуација. Во неа ја споредува Велика Британија со фашистички режим, а за кралицата вели дека не е човечко суштество.
Поради песната, членовите на групата беа апсени и напаѓани на улица. Песната беше забранета на Би-би-си и уште неколку радија, но сепак успеа да се искачи на второто место на британската топ-листа. И некои од продавниците за плочи одбиваа да го продаваат синглот од страв дека ќе ја навредат кралицата.
Синглот ќе биде реобјавен во две верзии во речиси 6.000 примероци.
