По три години, Виена си го поврати статусот на најдобар град за живеење на светот. Досегашниот лидер Оукленд падна на 34. место поради ковид-рестрикциите, пишува во годишниот извештај на Economist Intelligence Unit.
„Виена, која на ланското рангирање беше на 12. место по затворањето на музеите и рестораните, се врати на врвот, каде што беше и во 2018 и 2019 година. Стабилноста и добрата инфраструктура се главните предности за неговите жители, покрај добрата здравствена заштита и мноштвото можности за култура и забава“, стои во извештајот.
Европските градови заземаат шест од првите десет места. Зад Виена се Копенхаген и Цирих, па Калгари, Ванкувер, Женева, Франкфурт, Торонто и Амстердам, а Осака и Мелбурн ја делат 10. позиција. Лани на првите три места беа Оукленд, Осака и Аделаида.
Истражувањето опфати 173 града, а на дното завршија Дамаск, Лагос и Триполи. Киев овој пат не беше анализиран поради актуелната војна.