Во Дубаи ќе се гради првата 3-д отпечатена џамија на светот. Двокатната структура ќе може да прими 600 верници и ќе биде со површина од 2.000 квадратни метри. Изградбата ќе почне на крајот на годината и треба да заврши во првото тримесечје од 2025.
„Решивме да изградиме ваква џамија зашто е нова и иновативна технологија со која можат да заштедат време и средства, во споредба со традиционалните методи на градење“, кажаа од владата на Дубаи, и додадоа дека во изминатите години, 3-Д печатењето почна сè повеќе да се користи во градежништвото.
Дубаи сака да биде „главен град на 3-Д печатењето на светот“ и во 2018 усвои стратегија која предвидува 25% од новите градби во емиратот до 2030 да бидат направени на овој начин. До 2019 го држеше светскиот рекорд за најголема 3-Д отпечатена зграда, висока 9,5 метри и со површина од 640 квадратни метри.
