Бред Пит ќе ја толкува главната улога во новиот филм „Connector“, чија приказна ќе се одвива во Њујорк во 1970-тите години. Холивудскиот актер ќе игра работник што поставува челични конструкции на голема височина, а филмот ќе го режира Дариус Мардер, познат по остварувањето „Sound of Metal“.
Новата продукција ја најави „Епл оригинал филмс“, со што продолжува соработката на компанијата со Пит по филмовите „Wolfs“ и „F1“.
Според досега објавениот опис, приказната на „Connector“ ќе се врти околу работник од њујоршките градилишта, кој се соочува со сили поголеми од него. Засега не се откриени повеќе детали за ликот, за останатите актери или за датумот на премиерата.
Покрај главната улога, Пит ќе учествува и како продуцент преку својата компанија „План Б ентертејнмент“. Во продукцијата се вклучени и Диди Гарднер и Џереми Клајнер, како и режисерот Дариус Мардер.
Режисерот на „Sound of Metal“ зад камерата
За режијата е ангажиран Дариус Мардер, кој сценариото го напишал заедно со Нина Мардер.
Тој го привлече вниманието на филмската публика со „Sound of Metal“, во кој Риз Ахмед игра тапанар што се соочува со губење на слухот.
Филмот доби шест номинации за „Оскар“, меѓу кои и за најдобар филм и оригинално сценарио. Освои две награди – за звук и за монтажа.
„Connector“ ќе биде негов прв игран филм по „Sound of Metal“ и прва соработка со Бред Пит, пишува „Синема експрес“.
Пит повторно со „Епл“ по „F1“
За Пит, новиот проект означува продолжување на соработката со „Епл“ по „F1“, филмот во кој актерот игра возач што се враќа во светот на Формула 1.
Пред тоа, тој настапи и во „Wolfs“, каде што повторно ги здружи силите со Џорџ Клуни. Двајцата актери во филмот играат професионалци ангажирани да решат ист проблем.
Со „Connector“, Пит од тркачките патеки ќе се пресели во Њујорк од седумдесеттите, во приказна насочена кон човек од работничката класа.
Наскоро се враќа и како Клиф Бут
Во меѓувреме, публиката ќе го види Пит и во „The Further Mis-Adventures of Cliff Booth“, каде што повторно го игра каскадерот Клиф Бут од филмот „Беше еднаш во Холивуд“.
Новиот филм е режиран од Дејвид Финчер, според сценарио на Квентин Тарантино. Приказната е сместена во 1977 година и го следи Бут во Холивуд што се променил од времето кога публиката првпат го запозна ликот.
Според „Ентертејнмент викли“, филмот е најавен за ограничено прикажување во IMAX-сали од 25 ноември, а на „Нетфликс“ треба да пристигне на 23 декември. За „Connector“ засега не е објавен датум за прикажување.
Извори: TheWrap, Cinema Express и Entertainment Weekly.
