По години учество во организацијата на музичкиот спектакл, Џеј Зи самиот ќе застане на сцената на Супербоул. Раперот е најавен како главен изведувач на полувремето на финалето во 2027 година, кое ќе се одржи на 14 февруари на стадионот „СоФај“ во Инглвуд, Калифорнија.
Веста ја објавија НФЛ, „Епл мјузик“ и „Рок нејшн“, а најавата беше претставена за време на телевизискиот пренос на натпреварот меѓу Далас каубојс и Филаделфија иглс.
За музичарот ова е ново поглавје во односот со еден од најгледаните телевизиски настани во светот. Неговата компанија „Рок нејшн“ соработува со НФЛ од 2019 година и учествува во продукцијата на настапите на полувремето.
Во изминатите години на таа сцена настапија Ријана, Ашер, Кендрик Ламар и Бед Бани. Сега вниманието се насочува кон шоуто на добитникот на 25 награди „Греми“.
Во изјавата по повод најавата, Џеј Зи се осврна на патот од дебитантскиот албум „Reasonable Doubt“ до настапот на Супербоул, опишувајќи го како остварување на сонот по три децении музика и работа.
Настапот доаѓа по година во која раперот ја одбележува 30-годишнината од својот прв албум. Во рамките на концертната серија „JAY-Z30“, тој веќе настапи на „СоФај“ на 23 и 24 октомври.
Познат по хитовите „99 Problems“, „Hard Knock Life“ и „Empire State of Mind“, Џеј Зи ќе добие можност својата кариера да ја претстави пред огромна меѓународна публика. Настапите на полувремето на Супербоул во САД често привлекуваат повеќе од 100 милиони телевизиски гледачи.
