Лејди Гага и нејзиниот свршеник Мајкл Полански наводно направиле пауза од професионалните обврски за да уживаат во првите месеци од родителството.
Извор близок до двојката за „Пипл“ изјавил дека двајцата во текот на летото се повлекле од работните ангажмани за да поминуваат повеќе време со бебето.
„И двајцата блескаат кога зборуваат за тоа дека станале родители, а Мајкл изгледа поопуштено и посреќно“, изјавил изворот.
Лејди Гага и Полански го добија своето прво заедничко дете, објави „Пејџ сикс“. Името и полот на бебето, како и точниот датум на раѓање, засега не се познати.
Тричленото семејство неодамна било фотографирано за време на прошетка во Северна Калифорнија. На фотографиите, 40-годишната музичка ѕвезда го носела бебето блиску до градите додека Полански одел покрај неа.
Претставниците на двојката не одговориле на барањата за коментар.
Гага претходно зборуваше за желбата да стане мајка
Пејачката и актерка и претходно навестуваше дека основањето семејство е еден од нејзините најголеми приоритети.
Во октомври 2025 година, при гостување во емисијата „The Late Show with Stephen Colbert“, Гага изјави дека се надева оти мајчинството ќе биде нејзината „следна главна улога“.
Неколку месеци претходно, во интервју за „Good Morning America“, таа се опиша себеси како „семејна девојка“ која повеќе од сè посакува брак и деца. Гага откри и дека уште на првиот состанок го прашала Полански дали има исти планови.
„Пред воопшто да седнеме, го прашав: ‘Дали сакаш брак и деца?’ Тој одговори: ‘Да, сакам’. Јас реков: ‘Одлично. Сакаш ли шампањ?’ А тој рече: ‘Секако’“, раскажа пејачката за нивната прва средба во Лас Вегас.
Врската ја потврдија во 2020 година
Лејди Гага и 42-годишниот претприемач првпат беа романтично поврзани во 2020 година. Набргу потоа ја потврдија врската на Инстаграм, објавувајќи заедничка фотографија од јахта.
Нивната свршувачка беше откриена во текот на Олимписките игри во Париз во 2024 година, кога Гага го претстави Полански како свој свршеник при средбата со францускиот премиер Габриел Атал.
Подоцна беше објавено дека двојката се свршила неколку месеци претходно и дека веднаш ја споделила радосната вест со семејството и најблиските пријатели, но сакала деталите да останат надвор од јавноста.
Гага и Полански и понатаму внимателно ја чуваат приватноста, а засега не објавиле повеќе информации за новиот член на семејството.
